Lexique Provençal

Dans cette rubrique, des poèmes sont offerts à la lecture des internautes.

Amountagnàgi de nouéstei vaco 2025 à ROUET en QUEIRAS....

La vau quita ma cabaneto !
Tant agradablo que siguèsse
La vau quita moun oustaleto,
Ounte rejoun de tout moun esse,
M'aproufoundìssi sèns pauseto
Perdènt la march' à faire d'esse,
Pèr entiera dins dei fraseto
Lei mot lei pu bèu que l'aguesse !

Verai qu'es pas grand moun casau !
Just ço que fau à n' un bargié !
Dins l'ingrès qu'es un nisau,
L'a un pestrin qu'es pas lóugié,
Uno tauleto em' un grasau
Ounte li méti rèn que sié,
Quàuqueis óujèt emé mèi clau,
Dei ravaniho, deis esquié....

Coustié, s'atrobo 'no cambreto
Emé dei moble, sèns armàri
Doumàci souto lei traveto
Verai soun pas bèn aut lei bàrri.
Uno coumodo 'n pau viouleto
Un lié qu'es un pau militàri
Un estagnié 'mé dei taupeto ;
Vaqui lou mèmbre pèr mèi pàri.

Segur que subre lei paret
Ai agafa quàuquei tablèu ;
Un que reverto de Nouvé
La Santo Messo, que belèu
De nouéste tant poulit endré
Es la mai enciano : un calèu
Qu'esblèujo d'un biais tant escret
Un mounde fóu li courrènt lèu !

Ai mes tambèn quàuquei gravuro
Quàuquei foto emai d'eisino,
E pèr pantaia d'aventuro
Que l'a de que toumba d'esquino,
Ai empega dei viestiduro :
Coum' uno vièio limousino,
Dei blodo 'mé sèi perfiluro,
E dei taiolo en fiéu de Chino.

Dins la grand salo cenadou,
L'a un bufèt e un glissant,
D' assèti 'mé d'acouidadou,
Un viei bahut qu'es de ma grand,
'Mé dei fedo, d'esparradou
Escrincela pèr uno man
Fado d'un fèni ausadou,
Puei 'n' armarieto d'engarant !

Mai lou pu bèu es lou recaire
Ount' ai pousta uno litocho,
Que li poudèn, es moun vejaire,
Dourmi à doues, faire bambocho,
Tant soun espacious si vaire,
'Mé sa pouarto clauso pèr 'n' ocho
Entaiado coumo 'n i a gaire
Pèr 'quéstei man dei mai finocho.

Vaqui coum' es moun cabaniau :
Ni pichounet ni grandaras,
Just ço que fau, un bréu marciau !
Segur qu'es pas un castelas,
Mai proun mi basto : li siéu siau
Maugrat mèi viesti pataras,
Mai qu'empougnèssi moun piau
Pèr far la mousto d'un la gras.

Mai fau si leva de bouen' ouro ;
Tout lou restant es bachiquello
Emai souvènt proun à la bourro
Bougrejèssi en raganello
Dei mot groussié, bèn gras de chourro,
Chucous, que tant 'no bressarello
Aurié pas tant bello courpouro,
Ni la bèuta nimai l'astello.

Lou des-e-sèt dóu mes de mai
Á sièis ouro, 'mé mèis ami,
Tout en aio, en grand esmai,
Si retrouban, l'èr endourmi,
Dins lou courtiéu, que tóutei gai,
Risian sènso rèn repremi,
Dins l'esper d'aquest trabai
Que lou vivèn d'un biais coumi.

Fau butassa tóutei lei vaco
Dins un carras pèr lou bestiàri,
Qu'es pas butèto tras dei laco
De leis embuta sèns esglàri.
Car 'n i a doues, qu' emé quàuquei maco
Ìston reblado tau dei gàrri,
Mai lei quatr' àutrei, gaire flaco,
Móunton, souàrton dins qu'un catàrri !

Metèn tres ouro, à courre, fóu,
Tras lou campèstre, pèr lei prat
Mounte lei róumi, lei grifóu,
Sus lei tauvèro dei garat,
Nous escaràgnon à far póu
Nous fènt dei plago nacarat
Que sàngon e tout à l'en cóup
Fan dei caiastre bèn ouirat.

'Mé de paciènci, fin finalo
Dins lou semau, sai à l'estaco,
Leis embarran, noun dins d'estalo,
Mai coum' acò ; e chasco vaco
Si frustant quàsi de l'espalo,
A pèr tout soustr' uno bassaco
De paio 'mé bessai de galo,
Pèr segur, un boueno traco.

Perfin partèn, qu'es pas tróup lèu !
Sus chasco caro, un riset
Vèn d'espeli coum' un soulèu.
Enfin l'aupàgi, l'esparset,
Lou margai tèndre, lou fablèu
Dei grandei flour de gabarset
Que trachìsson sus lei relèu
D'aquéstei mount qu'an tant d'ausset.

E puei si maginan lei sero
Emé sèis àrpi d'espavenso,
Lei rupicabro qu'en galèro
Sus dei roucas, sèns perdre l'enso,
Sàuton d'uno talo manièro,
Que lei creirias coum' en suspenso
Sus dei cengle de pènd' esquèro,
D'ounte cóurron pèr recoumpènso.

S'enventan puei davans soun trau
Un' escarrado de muret
Que tre nous vèire, dins qu'un frau
Desaparèisson dóu tourret
Em' un siblet de tustassau,
Tau dei cassaire 'm' un sambet,
Puei pu rèn à despart dei rau
Qu'emé sèi pastre fìlon dre !

Se n'en fasèn di pantaissado...
De longo, tambèn de la routo
Engoulissen d'un' abrivado
Lei kiloumètre sèns revòuto,
Leissant de coustat lei taiado,
Lei prat mounte dei pico-mouto
Fan sèi fèn emé d'endaiado
De tréul' en flour e de garouto.

E puei pensan à nouest' amèu
De Rouet, luen, eilamoundaut,
Mount' au mitan dei grand troupèu
Ist' isoula 'mé sèi pradau
Sèis escrin blanc, sèis esboudèu,
E mounte l'erbo dei dedau
Es tant giganto de pourpèu,
Que trespasso d'un mètre d'aut !

Après quatr' ouro de vouiàgi
De sòmi, d'esvèi, de risado,
Aperçubèn nouésteis aupàgi
Entre douei bré, à bouen' aussado
Au mié dei séuvo d'aut fustàgi.
Oooo meraviho de masado
Rescoundudo....Oooo lou miràgi
'Queste nisau pèr d'estivado....

Lèu lèu quichan lou pedalié !
Á grand velòci tout d'un brand
Coumo fan lei grand bandoulié,
Founçan afri sus lou quitran
E tau coumo dei chivalié
Voulan subran tau d'auferan,
Devèrs un cèu enfantoulié
Dei niéu ventrescu, negre blanc.

Fin finalo sian à vounj' ouro
A Meyriés, au poun de casudo
Qu'arriban sèns bachas ni tambouro.
Eilamount tre nouest' aperçudo,
Nouésteis ami 'mé sèi toutouro,
Qu'esperàvon nouest' avengudo,
Nous fan un ciéucle tiro-bourro,
E nous embràsson 'm' esmougudo.

E sus la pisto, sus lou ribas,
Aro qu'ensen tóutei li sian
Au coumplèt, dins un brandabas,
Savié, noueste gènt coumedian,
Lèu Duerbe 'queste pourtalas,
Que l'a quatr' ouro en bouen gardian,
Avié barra em' un tancas,
Li apoundènt quàuquei lian.

Ooo qunt boucan 'mé lei campano !
Quasimen sàuton sus la routo
Que patùsclon sèns far d'engano,
Sus lou camin, noun tèsto-routo,
Mai disaverto 'mé d'ufano
S'adraiant deja dins lei mouto,
Cercant lèu lei flour de gensano,
E si repaisse dei garouto.

Eici sian tóutei mescladis !
Lei pastrihoun 'mé lei bergié,
Lei coumpagnaire passadis,
Lei vesin baile vo grangié,
Lei vaco qu'en barrejadis
Nous destrepàsson, couar lóugié,
Puei zóu mai à n' un japadis,
Pàrton luen dóu can estrangié !

La ribambello mounto, mounto,
Sus lou caminé de l'aupàgi.....
E lou troupèu vai, poujo, poujo,
Devèrs l'amèu à l'arrambàgi....
Ges de repaus, mai d'ors' à poujo,
Douçamenet, en roumavàgi,
Sus l'espalo pourtant sa bòujo,
Vesèn de luen nouest' armitàgi !

« ROUÈT.... Rouèt.... » crèidon urous
Lei jouvènt que làmpon deja
Sus lei grand prat escalabrous...
Puei sus lou regus d'un à plat
Restanca pèr un ro moustrous,
S'estiblant, bras en l'èr, rebla,
Si desparmóunon, auturous,
Creidant, bauje, '' sian arriba '' !!!!

Sus lou bescaume de la mèiro
Souàrton lei frumo 'm' un sourire ;
Puei s'apielant à la barrèiro
Pèr li moustra soun bouen coussire,
Enfounìon uno broucheiro
De cansouneto, sèns rèn dire,
Que dins l'istant aflambèiro,
La chourmo qu'a tant bel aubire.

Lou troupèu à l'abèuradou,
Si couloumo qu' es asseda ;
E 'mé sèi bano d'esgourjadou
Si bùsson pèr noun rèn ceda
Tau coumo leis aparradou
Quouro lùchon mum' encleda,
Tre qu'uno fedo en caufadou
Au roumagau a 'n' candidat.

E puei un cóup desassedado,
Si van coucha dins leis aupàgi.
Bèn au cagard, amalugado
Pèr un camin de pasturgàgi
Sèns bèure sounc' uno goulado,
Ni brafa un boucin d'erbàgi.
Pèr aro remóumion, cansado,
Presant lei planto d'afanàgi.

Lèu si sian tóutei rejougnu,
Leis escourrèire, lei bergié,
Lei viei dóu parla rascagnu,
Lei pastrihoun dóu couar lóugié
E dei vesin que benvengu,
Soun arriba 'mé d'estrangié,
'Mé lou curat, lou soul vougnu,
Que benesiguè l'abéié.

Alor, entour de la grand taulo
Tóutei brindan à la mountagno.
Chascun refoufant de paraulo,
Counto, coumo, d'ouro à l'eigagno,
Sènso jamai que sié 'no faulo,
A pouscu sègre fouero cagno,
Lou grand troupèu 'mé sèi canaulo,
Que bàio à tóutei la cantagno.

Un gròs gramàci en chascun
Pèr soun ajudo, soun trabai
Car de mounta, es pas tout un,
Que si carrejo dei rabai,
E deis eisino 'n i a mant' un !
Pèr toustèms prendren 'quest' estrai
De l'aupàgi, e 'n aguèss' un
Que desfautèsse, farié un tai !

A revèire, ami d'auturo...
A revèire dins qu' un' annado...
Dins Queiras, dins 'questo naturo
Que tant lindo l'an puei gardado
Sachessian sèns voues escuro,
Gramacia dins cha masado,
Chasque vilàgi, l'estacaduro,
Dei queirassen pèr sa valado.

Pierre Dominique Testa, Rouet lou 2 de julié 2025.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?