Lexique Provençal

Dans cette rubrique, des poèmes sont offerts à la lecture des internautes.

Voues.

Li anarai culi la bello estello aupenco,
Pèr vous Segnour, qu'encuei disès enca moun noum. .
Li anarai amount dins la vìo lachenco
E leissarai ansin la terro à sei coudoun.
Veniéu de m'esviha aquesto matinado,
Que ma maire m'avié d'ouro tira dóu lié,
E de sa douço voues, melicouso arpejado,
M'anounciè la mouart de l'ouncle risoulié.
Fuguèri bèn tristas d'aprene la nouvello
Car fuguè dei Proufeto, l'ounèste capoulié.
Es pèr vuei qu'es vengu la sourno daiarello,
Li coupa l'erbo au pèd, e lou mete au salié.
Buguèri un bouen cafè, couta au releisset
De l'eiguié, regardant dins lou boues leis aucèu,
Que dins sa farandoulo prenien de l'esparset,
Pèr basti soun nisau en poulit rigouncèu.
L'envejo mi coursè subran sus la verdesco
D'ana m'especeja dins la séuvo, lou prat,
E plen de croio, auturous, avert e bramo-lesco,
Vaguèri retrouba la pas qu'èri timbra.
Dins leis èr devistèri lou cèu tout bourroula,
Que mandavo un rebat, gela gris e menebre,
Que metè dins moun couer deja bèn treboula
Lou desrèi, l'amarun, un frejoulun jalebre.
La tasso dins lei man, buviéu de la bevèndo
Lei degout argentau negre, aisse e sutiéu
Quand dóu cèu uno voues tau coum'uno destèndo
Mi sounè d'adamount d'un toun resoulutiéu.
Pierre, dins qu'uno fes, moun Diéu mi sounerias.
Iéu, creseréu, panti, eitan lèu respoundèri
Un Oui, tout bounamen bessai que l'auserias.
Degun mi cridè rèn, pas degun entendèri.
Un fremin dins moun sang venguè jala moun couer.
Dintrèri dins l'oustau, d'en sus lou radassié
Prenguèri moun bloudoun que quichèri bèn fouert,
Vaguèri puei defouero escrachant lei pensié,
Chifrant que se segur fuguè de pèr d'avans
Que quauqu'un s'envenié de mi chama tantost.
Dins l'ouertou ges de brus, aqui souto l'envans,
M'apielèr'au poustèu, empougnèr'uno post.
Pèr amansi la pòu que gagnavo ma tèsto,
Bramèri un còup de mai au travèrs dóu camin
Un oui, que plen de plour faguè uno brudèsto
Que degun recassè franc d'un bèu pimparin.
Reclinèri lou suc, leis ue dins la neblasso,
Doumàci dins lou cèu moun armo s'envoulè,
Que voulié peramount parti luen la fournasso
Qu'aqui sus questo terro tant founs mi tascoulè.
Testo souto dintrèri dins moun sourne membroun
Qu'aviéu recounoueissu, Seignour, voueste ressoun.
Ma caro dins lei man, quitèri l'ue feroun,
Qu'adès avié frounsi, qu'èri en boulissoun.
Doumàci à la voues qu'afrido mi sounè,
Pousquèri pas pensa que dóu cèu fugue vous
Tant lou toun counvinsu au sòu m'abouchounè
Que venguessias encuei sèns'èstre rancurous,
Mi pourgi vouesto man, vouest'Amour à jamai.
Toumbèron de meis ue de tant grossei lagremo,
Qu'encar'aquestou jour, n'en ai un plen demai
Que rajon sus mei gauto e gausisson mei gemo,
De la sau que mi pic' e mi crebo leis ue.
Mai moun Diéu que sias grand coum'uno Catedralo
Vougués reçaupre encuei moun couar aquesto nue,
Encause que voudriéu d'un aucèu sus seis alo,
Vous rejougne eilamount dins lou nis celestiau,
Qu'avès despuèi toujour alesti pèr moun amo,
Pèr flouri Vouest'Autar d'un feisset dimenchau.
Durriéu-ti counfessa qu'es au cimié dei Carmo
Que vaguèri souvènt escampa dins un biau
Moun desrèi, moun segren, pèr vous toutei mei larmo ?
Emai que vouguessias mi manda en missien,
Caussa meis estivau, mei nautei garamacho,
Pèr èstre dins la Glèiso uno benesicien,
Encuei vous afourtìssi, qu'ai pati la soufracho,
De mi douna d'à founs pèr touei vouesteis enfant,
Car soun lei capelan, vouestei priéu auturous
Que m'an bandi defouèro e que m'an mes au banc
De seis endoutrinaire ém'un mespres afrous
Mai digne d'un demoun que pouarto lei sèt bano
Que sèmpre mi secuto de vous abandouna,
Que d'un prèire que crido, que soueno lei campano
Que fau toutei s'eima e à Diéu si douna.
Acèti o moun Diéu, que fuguèsse la nue,
Que pus degun vouguèsse de iéu dins vouesto Glèiso.
Un jour mi sounaran que sarai sus d'un pue
Pèr planta vouesto crous que sa visto m'amèiso.
Aquestou jour de vuei de Mars doues milo sèt,
Que venès mi cerca pèr lou quatrèime còup,
Vous proumèti Segnour qu'enrabia mi vau mète,
De samena lou gran, de bèn laura lou sòu
Pèr pousqué un jour à voueste Sant Servìci
Vous semoundre moun tèms meis ouro e mei foulié,
Canta dins Sant Vitour, aluencha dei broulìci,
E dins lou santuàri èstre vouest'insensié.
Es pas pèr estou jour, segur pas pèr deman,
Mai que siègue enca joueine vo bèn tout carga d'an,
Sarai lèst O moun Diéu de vous douna mei man
Que li counsacrarés moun amo qu'es à brand.
Gramàci moun Segnour, gramàci pèr toujour,
Gramàci pèr lei flour qu'enfioucon moun Amour.

Pierre Dominique Testa, le 5.3.2007.

:: LES POÈMES ::

Chaque visiteur peut nous envoyer un texte de sa composition, quelque soit le dialecte, quelle que soit la forme poétique, le registre, et la graphie. Il lui suffira de le saisir ci-dessous. Nous nous réservons le droit de ne pas mettre en ligne tout texte trop long, ainsi que tout texte hors des limites de la décence ouverte au public.
titre
texte
auteur
e.mail
1 + 1 ?