Noueste sìti à gràtis "http://lexiqueprovencal.com" de l'assouciacien "l'Espai Miejournau" prepauso un leissique óucitan de Prouvènço, leis estra d'un rouman " Fino e Cesar " dins quete l'autour Pierre Dominique Testa, escrivèire, li descriéu la vido d'uno famiho à Alau entre 1890 e 1995. L'assouciacien " l'Espai Miejournau " prepauso tambèn de pouèmo que leis amaire de la telaragno pouedon manda pèr leituro publico, ansin que de mouloun de liame emé de sìti en lengo d'Ó vo que pretocon la lengo d'Ó, aparia d'adrèisso indefugiblo.
Lei campano dóu Dijòu Sant. Lei campano dóu Dijòu Sant. Radas, enaut sus lou clouquié … Dins gaire, lei quatre campano Ficado sus sèis ajouquié, Fan s'envoula, noun sèns' ufano Escleirado pèr dei fasquié, Dins l'eterno vilo roumano, Pèr avé enjusqu'à l'anquié La benesicien subitano. Lou dijòu Sant, van s'enana, E sus la mar e tras leis aire Emé d'alo, van tresana D'avera puei qu'es moun vejaire, La Vilo Santo ; car l'ana, Es proun verai, mai d'un bouen faire, E quand touàrnon, van espera, Lou jour de Pasco, 'mé desaire. Trei jour de sourn' e de negrour, Trei jour d'uno tristesso founso, Trei nue 'mé l'àrci, 'mé dei plour Dins la vergougno dei semounso, Un Sant Tridium fa pèr l'Amour, Ounte lou Sang dintre la rounso Dóu boues, va crida la foulour D'aquest suplìci que n' emplounso. Soulet demié leis óulivié, 'Mé sèis ami que tìron pèno, Es au sóu sènso cativié Pèr lou que pèr quàuquei dardèno Lou vai denouncia ei troupié. E leis àutreis à la serèno Douàrmon siau maugrat soun despié Pèr Judas pres dins sa pantèno. Peravans l'our', en roudelet, Asseta dins un' auto salo, Avien manja coulin coulet, La Pasco façoun prouvençalo 'Mé l'agnèu au farigoulet, De vin serma, un pan de balo, E pèd descaus, sai risoulet, Avien dansa man sus l'espalo. E un cóup siau, puei d'agrouva, Lou Mèstre emé sèi man jouncho, Li moustrè lou Pan....z-ue leva, La tèsto clin', un pau de pouncho, Li diguè em' un èr greva : « Acò' s moun couers … » e caro founcho, Lei benesiguè, embuga, Qu'avié 'ja lei lagrèm' espouncho. E prenènt un coucourelet, Que li vuejè de vin à berlo, Li lou dreissè emé sèi det Resóuvu, carme, sèns' esperlo, E li diguè zóu mai, enquiet, « Acò' s moun sang … » e d'uno gerlo Un panouchoun proun minçounet Tirè : lei lavè 'm' uno pouterlo. Mai aqui dins leis óulivié La sourdatesco 'mé sèi pico Li van pas emé precaucié. Si coulóumon sus leis indico Dóu traïstre que seguissié, Sus lou Boundiéu, brandant pas brico, E l'enmènon 'mé d'óuficié Á Caliphe fouero lougico. Es alouro, dins lei ciéuta, Que van si teisa lei campano, En signe de dóu, d'amista, Pèr aquest Diéu, sèns ges d'ufano, Ome umilia que fa pieta, Qu'a jamai pres 'no vedigano, Pèr castiga lou qu'a peca Qu'à sèis ami a fa d'engano. Partès campano, teisas-vous ! Leissas lou mound' en entrumido Anas à Roumo, leissas-nous ! Á nouesto nue qu'es puei falido, Fès grand silènci, teisas-vous ! Bèllei campan' en depremido, Que sias partido, leissas-nous ! Vesès la nue qu'à l'assalido Prene lou mounde...Teisas-vous ! Pierre Dominique Testa, ALLAUCH lou 17 d'abriéu 2025 : Jeudi Saint. 
|
 |
 |
|
Pantai d’ivèr. (Pierre Dominique Testa, lou 10.2.2018.) |