Notre site gratuit "http://lexiqueprovencal.com" de l'association "l'Espai Miejournau" propose un lexique occitan de Provence, des extraits d'un roman dans lequel l'auteur Pierre Dominique Testa y décrit la vie d'une famille à Allauch entre 1890 et 1995, des poèmes que les internautes peuvent envoyer pour lecture publique, ainsi que des liens de sites en langue d'Oc ou sur la langue l'oc, couplés d'adresses inévitables.
Nerto De F.Mistral ( seguido 1 ) ( Elo, esmougudo, fai avans... E la lebriero vai davans.)NERTO II ........ A la Coumtesso de Toulouso LOU PAPO I’avié belèu setanto annado Que, liuen de Roumo abandounado, En Avignoun la Papauta Éro vengudo s’asseta. Avignoun, lèu, avié pres d’alo, En se vesènt la capitalo Dóu mounde e di pountife-rèi. En Jèsus-Crist tout ço que crèi Avié fidèu vira soun càrri Vers lou sejour de soun vicàri. Au Rose li nacioun bevien. Li Prince de la Glèiso avien, Long de la Sorgo e dins lis iero, Basti d’abitacioun princiero. Pièi di bourgés, pièi di catau Vesias à bóudre lis oustau Emé si troumpo e si lampeso E si téulisso à genouveso. De glèiso emé de rougadou, E de capello e d’ouradou, D’aqui, d’eila, n’i’avié de milo. A brand de-longo sus la vilo, De cènt clouquié lou brounzimen Campanejavo gaiamen. E dins la niue, iluminado, Lusien li vierge i cantounado. Mai lou palais pountificau Éro entre tóuti sènso egau. Encavala sus l’aspro Roco, Lou castelas qu’i nivo toco Encimelavo dins lou cèu, Sus l’esquinau de sis arcèu, L’espetaclouso carraduro De si sèt tourre en pèiro duro Que retrasien, en s’enarcant, Uno demoro de gigant. Au flume qu’à si pèd raiavo Lou mounumen se miraiavo, Segnourejant de soun autour La plano inmènso d’alentour; E dins li flour di fenestrasso Venien crussi li tartarasso; E de gros vòu de martelet S’ausien quila dins si merlet, Escambarlant lou Rose gounfle, Coume un camin d’arc de triounfle, Un pont de pèiro, aut que-noun-sai E long coume n’i’a ges bessai, Reunissié Franço e Prouvènço. E pèr courouno e pèr defènso Aguènt si bàrri flame-nòu, La vilo, pleno coume un iòu, Poudié dire: unguibus et rostro E davans tóuti faire mostro D’aquéu prejit de soun eigloun Que tèn li clau dins soun oungloun. Li Levantés ié traficavon; Li cardinau ié cavaucavon, Drapa de pourpro; li roumiéu De sant Antòni o Bartoumiéu Cantavon ferme pèr carriero; De braguetin, d’aventuriero, De fraire de touto coulour, D’escoumenja qu’emé doulour Se tabassavon la peitrino, De gènt de guerro e de marino Que se batien au cabaret, Éro un embroi, un chafaret Coume n’i’a ges en ges de rode! Quouro de Chivalié de Rode, Emé sa crous à vuech escot Broudado en blanc sus l’aubergot, Fièr, remountavon la Calado; Quouro en uno farandoulado Toumbavo, de mourre-bourdoun, Un predicaire de perdoun... De penitènt de touto traco Acipavias, cubert de saco; E de Batu, tóuti saunous, Qu’emé la cordo à triple nous Espelagnavon sis esquino: - Ah! car gouludo, car couquino, Te marfiren, te marfiren! E zóu! d’anchoio sus li ren; Pièi de dóutour charrant de sciènci; Pièi d’ltalian parlant de Riènzi; Pièi, trefouli de soun printèms, Li coulegiat galo-bon-tèms I bèlli dono enfenestrado Disènt de vers à la vesprado, Disènt li vers amourousi Ounte Petrarco fai lusi Soun inmourtalo avignounenco... Veici l’embassado espagnenco! Garas-vous: Moussu lou Viguié Acoumpagna de sis arquié! Li deputa dóu rèi d’Oungrìo! Vivo la princesso Marìo! Vivo lou papo Benezet! Oh! quento caud! oh! quento set! - A-Diéu-sias, dono Miquelasso! - Ah! mèste Éusèbi, que siéu lasso! Leissas-me prene moun ventau... Sias bèn que dins vòstis oustau. - Quau vòu d’arange de Maiorco? Courau fres! pastissoun e torco! - Ai! m’an peri moun bèu droulet! - Iéu ai perdu mi capelet... E de cridèsto, de bravado, De paro-garo e d’abrivado, Em’ un judiéu, de fes que i’a, Qu’alin davans cour esfraia. - Lou pecihoun! lou capèu jaune! A la jutarié! que s’encaune! - Cinquanto enfant ié soun darrié; E d’un poucèu, pèr trufarié, Simulant éli l’auriheto Em’ un gueiroun de sa braieto, Ié crido lou vòu d’esparpai: Vaqui l’auriho de toun pai! Sus tout acò fasènt tempèri, Fasènt eilamoundant l’empèri, Lou fourmidable maïstrau, Autramen di lou vènt-terrau, De liuen en liuen, dis àuti coumbo Toumbavo aqui coume uno troumbo; E dins l’espàci blanquinous, Lou tourmentau revoulunous, Aurias di, quand destéulissavo, Que lou soufle de Diéu passavo Pèr empourta sus li nacioun Dóu Papo la benedicioun. Mai l’erso mounto, pièi davalo. Aquelo poumpo triounfalo, Aquelo glòri èro à sa fin. Lou vièi Demòni, qu’es tant fin, Avié pièi mes lou Sant Coulège En malamagno. Un flèu eirège, Un lamentable treboulun Avié ‘strassa ço qu’èro un E rout la Glèiso en dos esclapo: I’avié lou Papo e l’Antipapo. De Barcilouno e d’Avignoun Pèire de Luno a li trignoun, E Bounifàci alin se noumo Pountife soubeiran de Roumo. Tènon pèr lou papo rouman L’Anglés, lou Franc e lou German; Mai Catalougno emé Prouvènço Volon lou papo d’en Durènço. Lou guerrejaire Boucicaut, Dóu rèi de Franço marescau, Es dounc vengu ‘mé soun armado, Emé lou ferre e la flamado, Pèr assieja lou rude vièi Qu’en Avignoun es papo e rèi. Despièi cinq an lou siège duro, E dis engen l’espetaduro Fai reboumbi despièi cinq an Li croto dóu palais gigant. Tout ço que roump o que petardo, Li couloubrino, li boumbardo, Lis espingalo e li canoun Escrapouchinon Avignoun. Bravant lou fiò, bravant la mino, Dins soun nis d’aiglo ounte doumino Entre li tron e lis uiau Lou grand pountife rèsto siau. E de l’Oulimpe ounte s’entrono, Éu, coume un Jupitèr que trono, Fai, subre lis assalidou, Plòure queiroun e petadou, E sus lou mounde lanço à bóudre Lis esluciado de si fóudre. De Catalan, d’Aragounés, Enredesi souto l’arnés E fieramen pourtant la capo, Lou fort es plen: pèr lou siéu papo, E quand lou Diable ié sarié, Se faran tia jusqu’au darrié. A soun cousin Pèire de Luno Lou sage rèi de Pampaluno, I’a quàuquis an, lis aduguè, Pèr mar e Rose quand venguè, Sus si galèro, rèndre óumage A Benezet coume un rèi mage. N’i’aguè de fèsto e de festin Pèr guierdouna Mounsen Martin! Davans sa court que l’acoumpagno, Benezet Trege au rèi d’Espagno Avié douna la Roso d’Or. E la ciéuta cridavo en cor: - Vivo lou jardin dis óulivo! Vivo la santo Glèiso! Vivo Lou Papo e soun gounfalounié! Mai vuei lou Papo es presounié. Tout vai en pire: la famino, La malo fam, mounto e camino, Mounto dins lou castelaras E di guerrié copo li bras. N’an plus ni pan, ni vin, ni viéure; Soun estequi coume de siéure; E, pèr lis asclo di carnèu, Tout en bracant si manganèu, Veson lou Rose avau dessouto, Carga de gran, carga de bouto. Meravihous, amount i’avié Un bèu jardin plen d’óulivié: Sus lis arc-vòut dis àuti salo, Sus lis augivo couloussalo Éro dins l’aire suspendu... Ai! dins la prèisso ounte es redu Lou paire sant, emé sa frucho La bello séuvo s’es destrucho, E n’an crema lou bos tout verd Pèr s’apara contro l’ivèr. Lou Papo sounjo, morne e blave. Li cardinau de soun counclave An passa tóuti à l’autre camp. N’a plus que dous, dous vièi cacan. Mai l’indoumtable patriarcho, Pèr soul que rèste dins soun archo, Vogo toujour, vogo bressa Sus lou Grand Chismo encourroussa. E quand evesque emai mounarco Volon lou traire de la barco, Éu ié respond: - Noun descendrai: Papo siéu, papo mourirai. Enterin, la pichoto Nerto Sort de la tourre... - Alerto! alerto! Dins lou palais s’entènd qu’un crid. L’aparicioun d’un esperit Aurié pas mai fa d’escaufèstre. Tóuti s’entrèvon que pòu èstre: Aragounés e Catalan Se precepiton barbelant Autour de la damiseleto; E la lebriero dindouleto, Ebrio de vèire lou soulèu, Emé soun mourre beisarèu, Sauto, fasènt cachiero en tóuti. Mai, au mitan d’aquéu dessóuti, Nerto, d’abord, vai demandant D’èstre menado au coumandant. Agouloupa de sa flassado, D’or e de rouge escarrassado, Lou capitàni dóu castèu S’aubourè dre sus sis artèu. Éro un maiòu de bono luno Mounsegne Roudrigo de Luno, Car dóu vièi papo èro nebout. Ardit, viéu coume l’ambre, au bout De soun fourrèu, dison, l’espaso Ié tenié pas: dous iue de braso, Uno creniero de lioun, Uni moustacho, un barbihoun Negre e fin coume péu de taupo... E malur pièi à quau lou chaupo! De fes que i’a, dins Avignoun, Em’ un parèu de coumpagnoun S’aventuravo à la sourniero, Courrènt de-niue li catouniero, Escaladant sus lis autin, O bèn cantant sus li pountin: « Au calignaire que barbèlo Venès durbi, venès, la bello! » Zóu pièi de trin, à tè, n’en vos? Batènt la gàrdi e lou prevost; E l’endeman, dins quauco androuno, Sus lou lindau d’uno mandrouno Se rabaiavo dins lou sang Quauque jouvènt agounisant... Mai d’esparrado enca plus grosso, De crime fòu, de causo atroço, Courrien sus lou nebout papau; E quand se dis, n’i’a proun un pau. Figuras-vous, dono, l’entrigo, Quand dins si bras Mounsen Roudrigo Veguè toumba lou gènt pougau Espavourdi coume un rigau! - Pèr vous servi, damiseleto, Se fau, diguè, prendrai d’aleto: Digas-me lèu ço que voulès, A vòstis ordre iéu siéu lèst. - Vole, faguè la gènto Nerto, Vèire lou Papo. - Soun duberto Li gràndi porto dóu palais, Bello, pèr tout ço que vous plais. - Acò disènt, Mounsen Roudrigo, Coume l’aucèu quand vèi l’espigo, Se trais vers elo poulidet En ié beisant lou bout di det. Souto lou bras aqui l’enmeno. Pèr d’escalié de touto meno Ounte d’arquiero fan lusour, Taia de-fes dins l’espessour Di muraiasso, pèr de porto, De ravelin e de redorto, De virouioun, d’esmaradou, De trepadou, de courredou Long que jamai noun se terminon, Mounton, davalon e caminon, E recoumençon de mounta. De l’ufanouso Papauta Veson à bóudre la drudiero: De mouloun d’or, uno argentiero De vas de glèiso, un peireguié, Un estelan, un beluguié De gros diamant, de celidòni, E d’esmeraudo e de sardòni E de carbouncle e de lapis; Pièi l’espandido di tapis; Pièi li drapèu qu’an pres i Mouro, Eilalin, en Terro-Majouro, Li prince de la Crestianta. Elo, enterin, i’a tout counta, E i’a counta, touto esperdudo, Coume au Demòni l’an vendudo. - Iéu, Don Roudrigo ié disié, Pèr vous sauva de l’Aversié Vese un remèdi inapreciable: Sabès quau pòu gibla lou Diable? I’a que l’amour. - E qu’es l’amour? Elo diguè, n’en fan rumour Dins li cansoun e dins li novo... Mai quau pòu dire ounte s’atrovo? - Poudrai belèu vous ié mena, Venguè Roudrigo afeciouna. Lou carreiroun dis amoureto, Plen d’oumbro claro e de floureto, Es lou camin dóu paradis. - Pamens, moussu, Nerto ié dis, La santo Glèiso nous ensigno Qu’es plen de pèiro e plen d’espigno Lou carreiroun paradisen. - L’amour es un bouquet au sen! Faguè Roudrigo, es un calice D’ipoucras pur e de delice! L’amour es uno font que nais E que souspiro dins soun nais E, risouleto, pièi aboundo E coume un flume pièi desboundo; E tout-de-long, dins sis iscloun, Fan que canta lis auceloun. L’amour es un dous treboulèri, Es un gounflige drud e lèri, Es un pantai ounte l’on viéu En se chalant coume de diéu; L’amour es uno escandihado Ounte dos amo enebriado Prenon lou vanc jusqu’au trelus E s’embessounon à noun plus; L’amour es uno flamo fino Que dins li lugre se devino, Qu’emplis lou cor en l’embaumant E que se douno emé la man; Es un souspir, uno alenado Que cuerb de flour li bouissounado; Enfin es uno bouco en fiò Que barbelejo e trovo en-liò De que ié béure en disènt “ more! “ Senoun sus uno bouco sorre! - Mai coume anavo se beissa, Lou galantin, pèr embrassa, Dins soun foulige, l’innoucènto, Sus la muraio, aut, se presènto, Li bras dubert, un crucifis Que la doulour espeloufis Emé dos clau acrouselado Souto uno tiaro escrincelado. Nerto faguè ‘n signe de crous, E ‘n se virant vers l’amourous: - Bèu chivalié, diguè, me sèmblo Que vosto dicho noun ressèmblo A la dóu Breviàri d’Amor, Car, dins aquéli pajo d’or, Iéu ai legi qu’amour dèu èstre Pur coume au paradis terrèstre... En aut dis escalié d’ounour La damisello e lou segnour, D’aquéu moumen, just se troubavon. Avau, inmènse, trestoumbavon Li mountadou de mabre blanc. Mounsen Roudrigo diguè plan, En empegnènt uno grand porto: - Moun cor, noblo dounzello, emporto L’espèr, un jour, d’agrada miés... Intras aqui: lou Papo i’es. - Em ‘un tramblun, dins l’Amirando Nerto s’enintro. Auto emai grando, Éro, la salo d’aquéu noum, La meraviho d’Avignoun. Entre li branco gigantesco De sa careno, sus la fresco, De mèste Memmi lou pincèu Avié representa lou cèu E tóuti si magnificènci. Tout revelavo la presènci Dóu grand pountife di nacioun. Pèr li fenèstro à crousihoun, Emé si plano e sis auturo Se desplegavo la naturo, E l’iue ravi poudié coumta Tóuti li Sorgo dóu Coumtat, Tóuti li vilo ounte s’enisso La richo terro de Venisso. Benezet Trege, pensatiéu, Éro davans soun prègo-Diéu; E peralin éu countemplavo Lou jour de Diéu que trecoulavo, Trasènt un vièsti rouginèu Sus lou Ventour cubert de nèu. Éro un grand vièi en raubo blanco, Em’uno barbo jusqu’is anco, Auturous, maigre coume un Crist, D’iue à la sousto e lou founs trist Aprefoundi dins si pensado, D’aquéu moumen vèi estrassado La Crestianta; vèi, d’eilamount, La Glèiso à brand sènso timoun; Vèi, dins la mar que mounto e reno, Li sàntis amo traire peno; Vèi li Councile en sèns divers Qu’escandalison l’univers E s’entre-jiton l’anatèmo; E, de soun sacre prenènt tèmo E se cresènt papo verai, Éu dis pamens: “ Noun plegarai ! “ Tant-lèu la porto s’es duberto, Vers lou sant paire arribo Nerto, E, touto clino à soun aspèt, Elo, d’un vanc, toumbo à si pèd. - Quau siés? e d’ounte siés, ma fiho? Ié fai lou Papo, es meraviho, Pèr l’aspro guerro que nous fan, De çai te vèire, pauro enfant! - Escoutas-me, paire santisme! Nerto respoundeguè, l’Autisme Me mando iéu en messagié Pèr vous gandi foro dangié. Castèu-Reinard es moun repaire; Lou baroun Pons, acò ‘s moun paire... E vès-eici l’estigacioun: Règno uno coumunicacioun Entre Tourrias, la tourre vostro, E lou castèu qu’alin se mostro. L’on pòu, segur, se i’avanqui, Car siéu vengudo pèr aqui. Papo Clemènt e Dono Jano, Quand dóu castèu èro estajano, I’a cinquanto an, à l’escoundu Faguèron fouire aquéu coundu, Pèr que lou Papo souto terro Pousquèsse fuge en cas de guerro... Pèr vòsti dre persecuta, Paire, vaqui la liberta! I’a la Prouvènço independènto Que vous espèro avau, ardènto: Li ciéutadin e li baroun D’Arle, di Baus, de Sisteroun, De Draguignan, de Castelano, De la mountagno e de la plano, Vous gardaran, vous mantendran, Car sias de Diéu lou prèire grand! - Diéu pouderous! acò ‘s estrange! Cridè lou Papo, siés un ange! Un ange pur manda de Diéu Pèr escarnaisse li catiéu! - E Benezet, levant sa dèstro, L’avié deja, soulènno e mèstro, Mougudo en crous pèr benesi, Quand tout-d’un-cop s’entènd crussi Dins lou palais quicon d’ourrible... Dins l’Amirando intro, terrible, Roudrigo de Luno en cridant: - Eiçò ‘s lou jour de noste dan! Tout es perdu! Lou palais brulo! E lou fiò-grè, paire, barrulo Sus li cresten dóu castelas, Fouita pèr l’orre mistralas: Sus li sèt tourre plòu de boumbo; Dirias avis que lou cèu toumbo Pèr escracha coume un grignoun La papauta d’en Avignoun... Ah! la destrau de l’esclapaire Es dins lou trounc: fugès, sant paire, Encò dóu pople prouvençau: E quand vendra lou grand assaut, Nàutri, se fau, dintre l’encèndi Periren tóuti carivèndi En derroucant nòsti merlet Sus Boucicaut e si varlet. Lou Papo s’ageinouio e prègo: Soun iue dins l’infini s’ennègo, En disènt plen de majesta: “ Siegue facho ta voulounta! “ Pièi, coume un aubre que s’aubouro, Après l’esbrand d’uno auro bourro, Eu, l’aubre-mèstre, tourno dre. E s’adraiant vers la paret, Pren lis espèci counsacrado Que sus l’autar èron sarrado, E dins un reliquàri d’or Li rejoun bèn contro soun cor. Adounc, acoumpagna de Nerto Que sa lebriero disaverto Noun a quitado desempièi, A pas couchous, lou noble vièi Davalo is escalié de mabre Que li mourènt e li cadabre N’ensaunousisson la blancour. En travessant dins la grand court, Si vièi sóudard ié fan carriero, E, pressentènt l’ouro darriero, Van à mouloun s’ageinouia Souto sa man. De fes que i’a, Lou crèbo-cor en van s’estoufo, E dins lou brut dóu vènt que boufo Parton li plour e lis adiéu. Mai Benezet, pourtant soun Diéu, Escalo amount sus la courtino. Pereilamount, claro, argentino, Uno campano alor sounè: Tout Avignoun n’en tresanè E li trabu faguèron pauso, E s’esperè de gràndi causo... Car de pertout sabien li gènt Que la campaneto d’argènt Eilamoundaut jamai sounavo Que quand lou Papo s’entrounavo O quand pèr éu venié la mort. 
|
 |
 |
|
Voues e Crous (Pierre Dominique Testa, lou 17.10.2008, ) |